जुनि रुसियौ हे सुन्नरि आहाँ

जुनि रुसियौ हे सुन्नरि आहाँ
जुनि  करियौ  एहेन बेवहार
सकल मरद पर राज अहीं केर
नतमस्तक  सोझां  संसार

नित नबका फरमाइश सुनाबी
अपनहिं मोनक हुकुम चलाबी
रुसब , कानब , मुँह फुलाएब
ई  केहेन अस्त्र , केहन प्रहार ?
                जुनि रुसियौ हे सुन्नरि आहाँ
                जुनि  करियौ  एहेन बेवहार

सीरियल मे  नीकहुँ के देखियौ
रत्तियो भरि त' निकहा सिखियौ
रहै जे छी फुफकारैत सदिखन
कोना हेतइ  ई  सब स्वीकार ?
                जुनि रुसियौ हे सुन्नरि आहाँ
                जुनि  करियौ  एहेन बेवहार

बुझलऊँ दुर्गा - काली छी आहाँ
कलियुग मे  नखरावाली  आहाँ
केहेन  छेब  सब  देह  बेसाहल
कोना  कए भेलियै  बेसमहार ?
                जुनि रुसियौ हे सुन्नरि आहाँ
                जुनि  करियौ  एहेन बेवहार

हाल जे देखल अग्रज सब केँ
पत्नि प्रताड़ित बेचारा सब केँ
रही अकानैत बात हम सबटा
की दिल्ली'क लड्डू एतेक बेकार ?
अछि बदलि रहल " नारी संसार "
                जुनि रुसियौ हे सुन्नरि आहाँ
                जुनि  करियौ  एहेन बेवहार
               
                       ...✍📷 मनीष झा