लिअ नें एखनों कोरा यौ !(वाल गीत )

लिअ नें एखनों कोरा यौ

✍👤अनुप मिश्र 

कखन सँ नें कानि रहल छी
लिअ नें एखनों कोरा यौ !
मां छोड़नें अछि असगर हमरा
कहलक देबौ अंगोरा यौ !

पकड़ि- धकड़ि क' भैया- आनैं
खुअबै मारि छहोरा यौ !
हम रहैत छी टुकटुक टकैत
ल' क' हाथ कटोरा यौ !

बड़ दुख होइयै, बेटी छी तैं
अहुं न बनबै घोड़ा यौ !
असगर रहनें नै चिंता छल
भेलियै जे हम जोड़ा यौ !

फुसिये कहलहुं लछ्मी आयल
हम त' फाटल बोरा यौ !
गोर लगै छी कनियो छन लए 
लिअ नें हमरो कोरा यौ !

कोन दंड द' भेजलनि दइबा
माथे लिखलनि लोढ़ा यौ !
बुझबै बाबा, मरिहम तहिया
जहिया जायब असोरा यौ !

कखन सं नें कानि रहल छी
लिअ नें एखनों कोरा यौ•••••
लिअ नें एखनों कोरा यौ•••••
•••••••••••••••••••••••••••••••

✍👤अनुप मिश्र (दिल्ली)
||||||||||||||||||||||||||||||||||||||||||||||

लेखक - अनुप मिश्र जी