अपन गाम

चल-चल मीता ,, रे मीता !
चल चल मीता अपन गाम छै सब सँ सुन्दर मिथिला धाम
काज - राज के दहक विराम चल घूमि आबी अपन गाम
चल-चल .........

हो ~ बोली छै मिठगर एतए  माटि छै पावन
सीता बहिन केर नीपल मिथिला केर  आँगन
कोशी  बहै  छै  बिहुँसैत  कमला - बलान रे
चल मीता बैसब सब मिल अपन दलान रे
सउँसे गम-गम करए छै महुआ-२ आर गाछ में आम
रे चल - चल मीता अपन गाम ......

चल घूमब डीह अयाचिक सरिसब गाम में
घूमब  जनकपुर  सउँसे  अपन परिधान में
चूरा-दही, चीनी,तिलकोरक तरुआ,आचार रे
भरि पेट खेबए हेतए दन-दन मियाज रे
सुग्गा जतए वेद सुनाबए -२ पाहुन छथि श्री राम
रे चल चल मीता अपन गाम छै सब सँ सुन्दर मिथिला धाम
काज - राज के दहक विराम चल घूमि आबी अपन गाम

                       •••••• ✍Manish Jha