जे मजा छै अपन पान आ मखान मे

जे मजा छै अपन पान आ मखान मे।
     

मखान

✍नरेश कुमार विकल

ने मजा रूसे मे छै ने अमेरिके मे छै
मजा छै ने ई चीन आ जापान मे
जे मजा छै अपन पान आ मखान मे।

पान

भोर सींथक सिंगार सांझ महफा-कहार
स्वर्ग एखनो छै गाछीक मचाने मे
ई मजा छै ने अफरिका-ईरान मे।

कोशी-कमलाक कात खोंटथि करमीक पात
जे मजा छै घोघ तऽर कें मुस्कान मे
ओ मजा छै ने सुरूज आ चान मे।

देखू मंडन आ चन्दा-अयाची
पाग कोकटीक आर धोती साँची
बहुतो विद्यापति बैसल बथान मे।

भोर भैरव मनाएब सांझ शिवकें सजाएब
ओना भक्ति छै सभ भगवान मे
बसल मिथिला छै सीताक परान मे।

माँ सीता

✍नरेश कुमार विकल