बटगबनी गीत ( बैसाख मासक लेल )

बटगबनी गीत (बैसाख मासक लेल)

✍👤शिव कुमार झा टिल्लू
***************************
चलू सखि सभ मिलि बुल' बिजुबन
खटगर टिकुला तोड़बै ना .
किछुए दिवस बचल नैहरमे
हियासँ हियाकें जोड़बै ना......
माँतल वसंत जुआनी 
बाप- पित्ती भेला खरिहानी 
गाछ - वृछ अपने ओगरबै ना
भावक सातोरंग मिलाक' 
नैहरक प्रेम सुररबै ना ! 
एक दोसरसँ बदलब चूड़ी 
जूड़शीतलक दलिपूड़ी 
अचारक संग कतरबै ना
खटगर देखि दाइ'जौं डांटथि
बिनु परवाहि ससरबै ना !
बाटकात पोदीनक पत्ता 
बूट खसखस चतरल खत्ता
खोंटि आंचरमे धड़बै ना
फेरि एक्केसंग बैसिक' चखबै 
एक्केसंग पसरबै ना !
आब ककरासँ डरब सिनेही 
बेटीधन आनक गेही 
श्रद्धा फूलकेँ लोढ़बै ना
राखब मोन सुदिन जीवनभरि
नेहक नोरमे बोरबै ना !

कवि - शिव कुमार झा 'टिल्लू' जी